政情：蕭嘉怡樂做街坊契女
隨着區議會議席不斷增加，愈來愈多後生仔從政，好多仲係靚仔靚女。好似同心網絡副主席蕭嘉怡（Kathy），就有意喺十一月參選中西區區議會選舉，挑戰白鴿黨員。
Kathy話，佢喺幾年前開始服務社區，同老人家有傾有講，加上佢待人親切，令好多年長街坊爭住認佢做契女，不知不覺間無端端多咗好多契爺同契媽。
既然叫得契爺契媽，Kathy同佢哋自然無所不談，最近有個老人家嘅一番話更令佢好感概。Kathy憶述，有個老人家同佢訴苦話，政府最近決定派六千元，但佢個仔居然想攞埋佢嗰六千元，Kathy聽到都好心酸，唯一可以做就係化身社工，好好安慰對方。
講開社區服務，Kathy話上環同中環一帶嘅交通配套不善，老人家成日要行樓梯上山落山，有條梯級仲有成二百級，都真係好蝦人行，所以佢爭取喺近上環荷里活道至般咸道一帶，盡快增建行人扶手電梯。可惜夕陽政府並非急市民所急，經常踢一踢先至郁一郁，睇嚟Kathy應該惡啲逼班庸官做嘢先至得。