政情：網民惡搞早禱會高官烚吓烚吓
添馬艦新政府總部尋日正式揭幕，可惜依然甩漏處處，全因好大喜功嘅煲呔曾為咗個人威威，不理工人死活都要趕工入伙，之前已經有網民睇唔過眼惡搞特首辦幾幅相片示警，更有網民將煲呔曾首次喺新總部主持「早禱會」嘅圖片惡搞，揶揄佢哋其實喺度「炒雜燴」打邊爐，好似成班夕陽政府庸官坐埋一枱烚吓烚吓等收工咁嘅樣，咁樣畀人揶揄，班庸官應該好好反省吓。
國務院副總理李克強訪港三日行程風塵僕僕，直到尋日離開前為新總部揭幕，但罕有地無發表演講，只有煲呔曾唱獨腳戲致辭，領導人前後只係逗留咗六分鐘，時間之短反映佢對新總部有幾重視。反觀煲呔曾就為呢六分鐘面子工程日趕夜趕，甚至偷工，日前終於趕出「豆腐渣」工程，搞到有警員為安檢踩線踩錯腳墮樓重傷，為新總部流下「第一滴血」。
揶揄炒雜燴又食又拎
最不幸嘅係，煲呔曾尋日喺致辭時仲吹噓新總部係「門常開」，講到有幾成功，除咗偷工引致質量問題外，新總部仲閉門造車，連基本示威遊行表達自由嘅權利都受到諸多阻撓，惹來不少網民不齒煲呔曾淨係識領功，先後多次惡搞特區政府嘅網上相片。要數最有創意嘅改圖，就係惡搞入伙當日煲呔曾主持「早禱會」嘅相片，改為打邊爐大會，其中煲呔曾被惡搞一路食嘢一路睇艷女，政務司司長唐英年就睇住國家領導人幅圖片，潛台詞係夕陽政府淨係識「又食又拎」，凡事都想「炒雜燴」蒙混過關喇！
夕陽政府唔知醜想蒙混過關嘅事點只咁少，勞工處處長卓永興尋日出席建造商會安全推廣啟動禮時，更大言不慚講職安健意識，特別提到喺烈日當空工作嘅紮鐵工人慎防中暑，同時注意高空工作時安全問題等，講到夕陽政府好似係良心僱主咁，但其實完全漠視之前有新政府總部工人家屬投訴猛加班搞到無得享天倫之樂，甚至有警員執勤時受傷出現「第一滴血」等問題。
老實講，如果夕陽政府再專橫跋扈治港，令市民惡搞圖片都唔能夠宣洩憤怒，市民遲早以更激烈方式向政府表達意見，到時夕陽政府就真係日日都有得震無得瞓喇！