中環出更：名人踩單車 撐博愛籌款
近年愈來愈多潮人迷上踩單車，令到呢個運動增添幾分潮氣。尋日一眾城中名人現身尖沙咀The Mira酒店，齊撐由博愛醫院主辦嘅「滙豐博愛單車百萬行」啟動儀式，為十月九日喺天水圍舉行嘅活動熱身。幾時都充滿活力嘅博愛主席湯修齊（Henry），到時都會帶埋太太及一對仔女落場參加。
踩單車籌款係博愛嘅年度盛事，一眾董事局高層梗係要空群而出力撐。身兼總理嘅縱橫遊第二代袁振寧同太太林藹欣（Ivy）拍拖前來，Ivy係上市公司華訊主席、博愛前副主席林賢奇嘅愛女，今次佢都有份贊助，全家人行善不甘後人，認真抵讚。
朱繼陶快飲新抱茶
熱心善長仲有太子珠寶執董朱繼陶（Joseph），卓妮見佢春風滿面，原來就嚟飲新抱茶，獨子朱國良下月八日將喺會展擺酒結婚，恭喜！恭喜！唔知到時囡囡朱紫嬈會唔會喺哥哥嘅大日子獻唱助興呢？
菱電集團太子爺胡曉明（Herman）就以協辦嘅香港單車聯會主席身份出現，佢笑稱自己踩單車目的係燒脂，而唔係比賽鬥叻。