運輸運輸，運都輸埋，所以運輸署注定係一個時運低嘅黑仔部門。點樣黑仔法呢？即係咁，審計署一次又一次瞄準運輸署官老爺嘅八月十五狠狠發炮，批評該署胡亂興建使用率偏低嘅天橋同隧道。
鋪橋搭路本來功德無量，問題係為人處世切忌過火，一過火就弊傢伙。好似深水埗九江街一條隧道咁吖，上世紀八八年落成，造價一百九十六萬元，由於位置偏僻，所以使用率低，結果淪為癮君子天堂以及露宿者之家。為咗避免出現治安問題，九江街隧道落閘封閉，一封就封咗二十三年。審計署就話嘞，運輸署一直冇解釋興建理據，每年花費五萬元維修保養，等於二十三年來白白浪費逾百萬元公帑。
隧道既然形同廢物，係咪應該拆鬼咗佢呢？理論上當然應該啦，可惜運輸署原來好鍾意死雞撐飯蓋，佢哋話喎，九江街隧道係署方有意推行改善措施嘅其中一條隧道，正與有關部門探討開放隧道嘅可行性，並且商討所需配套措施，包括如何改善現有行人網絡嘅接駁安排，重開時間表有待進一步落實。
嘩！重開一條設計錯誤導致人迹罕至嘅荒廢隧道，你話係咪執迷不悔吖？更加令人擔心嘅係，萬一再次淪為癮君子天堂以及露宿者之家，罪惡淵藪呢家嘢隨時為街坊街里帶來無窮禍患。
審計署調查仲發現，青山公路行人天橋特別多，多到對行人毫無作用。政府動用八千八百九十萬元喺荃灣第二區至嘉龍村興建十一條行人天橋，○五至○六年先後啟用，每年維修費六十萬元，配合青山公路嘅改善工程咁話。弊就弊在部分天橋嘅位置根本非常吊腳，好多人寧願喺橋底違規亂過馬路，都唔願意左兜右兜上橋落橋。根據運輸署數據顯示，十一條天橋附近橫過馬路嘅行人之中，有三成半棄用天橋亂過馬路。
運輸署企圖吸引更多人使用荒廢隧道同過剩天橋，唔係話唔得，難度高咗啲。你有本事咪向用家派錢囉，人哋收買路錢，你就派過路錢。又或者安排性感美女歌舞團助興，路人甲乙丙就算兜路兜到天腳底都去瞓身支持你啦。立法會議員王國興同功夫茶英雄所見略同，佢建議部分使用率較低嘅行人隧道，應該准許小販擺賣，吸引附近居民進出。
錯就要認，打就企定，千祈唔好一錯再錯，繼續浪費公帑掩飾官僚錯失絕對係反智行為。計功夫茶話齋，如果唔清拆荒廢隧道，咁就要清拆爛鬼招牌，一於將運輸署改名為混帳署！