鍾樹根算係「永遠的第二梯隊」，由十年前開始幫程介南「抬轎」，一直抬咗幾個人入立法會，到依家都係第二梯隊，好似永無上位之日。有傳話佢心有不甘，講明如果黨內唔畀佢去選，就索性退黨。民記為免傷和氣，再加上鍾樹根有多年地區工作經驗，喺東區有一定實力，無功都有勞，姑且畀佢一試。
有民記中人分析，話鍾樹根可帶隊取東區同南區票源，另一人就主攻灣仔及中西區，到時民記染指兩席絕對有機。
講到尾，用番鍾樹根都怪張國鈞自己唔爭氣，本來民記已安插佢喺西環頂替退休嘅陳特楚區議會席位，但聽聞連呢個位都危危乎，要民記再搵個安全位置畀佢先得。