政情：肥亨以股妙喻鐵三角
前商務及經濟發展局局長馬時亨尋日化身財金評論員，以財金角度點評疑似特首候選人唐英年、梁振英與范徐麗泰呢個「鐵三角」，將三個人比喻為三種唔同嘅股票，三個人邊個好啲？就睇吓邊種股票啱你嘞。
話CY似科技股
肥亨尋日喺一個電視節目上話，唐唐係公用股，其特徵係穩定性高，投資有息派，盈利增長亦好易預測。肥亨形容范太係銀行股，因為對方好似商業銀行咁係穩健派，但目前投資環境唔清楚，貸款搞唔搞得掂亦都唔清楚，至今亦都聽唔到好多佢嘅理念喎。對於梁振英嘅評論，肥亨就無咁客氣，佢將梁振英比喻為科技股，笑言創新並非壞事，但佢話鋒一轉，潑冷水話科技股條路好艱難，得嘅話就不得了，亦有風險搞到焦頭爛額，好似二○○○年科技股爆破咁。
肥亨依家係中策集團主席，佢嘅點評有無反映財經界人士意見，就得佢至知嘞。