政情：新立會海景議辦錯配？

據聞喺新嘅立法會綜合大樓，每層都有一個議辦擁有無敵煙花海景，但就咁啱由過往甚少返中區議辦工作嘅議員使用，有嘥料之嫌。

親疏有別 愈保皇愈「低層」

議員嘅辦公室喺新大樓佔咗五層，但樓層編排疑似親疏有別，立場愈激愈反動就編喺愈高層，愈保皇就愈低層。

例如成日鬧政府同開會掟嘢嘅人民力量及社民連嗰三位議員，其議辦就喺最高嘅十樓；民主黨加七名「散件」泛民議員喺九樓；公民黨同不時與政府唱反調嘅五散人、自由黨及新民黨葉劉淑儀喺八樓；經濟動力、專業會議、加五名「散件」建制派喺七樓；最保皇嘅民建聯、中總黃宜弘同工聯會，就喺最低層嘅六樓。有議員笑言，將來有乜重大議題要緊急進行表決，一眾保皇黨議員肯定會快過班反對派仆落樓投票，對政府有利。

有做過實地視察嘅議員爆料，新大樓高座每層都有一個無敵煙花海景位，估計市值月租肯定萬萬聲，分別編配咗畀人民力量陳偉業、民協馮檢基、廠商會林大輝、體育界霍震霆同立法會主席，其中霍震霆出名係立法會大懶蟲，連立法會大會都成日缺席，更何況返中區議辦辦公。

兩位地區直選議員，即係大舊陳偉業同馮檢基，喺區內嘅時間特別多，唔一定會長駐中環。

林大輝都算勤力，但平時多數喺佢尖沙咀嘅辦事處辦公。至於立法會主席，就更加有另外一間主席辦公室。辦公室咁編配法，係咪嘥料咗啲呢？