中環耳目：鄭錦鐘品嘗龍躉「不見天」
數名人圈「招積食神」，保良局副主席鄭錦鐘（Eric）絕對係「幫主」，佢出名嘴刁，山珍海味食得多，已冇乜驚喜。佢聽聞旺角龍躉專門店鉅龍酒家新開張，即時食指大動。Eric唔精唔食，柯打一味「不見天」。係乜東東？原來係龍躉下巴肉。
下巴肉質嫩滑
Eric飯腳老友多，呢日相約好友保良局副主席顏金煒及菁英會主席洪為民（Witman）聚餐。人稱「龍躉大王」嘅老闆吳伯恩親自招呼，佢首推肉質極嫩滑嘅清蒸龍躉下巴。龍躉下巴又名「不見天」，係因為龍躉游水時下巴永遠向下，正是不見天日。吳老闆話，一條四、五十斤重嘅龍躉，僅可取出一碟約十多舊「不見天」，每日限量供應，認真矜貴。再來係鍋燒龍躉扣，即係龍躉胃部，其價錢比下巴更貴。
Eric今年六月獲委任為道路安全宣傳運動委員會主席，委員會最近搞咗個道路安全攝影比賽，收到唔少參賽作品，而Witman就係交通安全隊副總監，原來除咗食，Eric同Witman仲有一個交通安全嘅共同話題。
