中環出更：飛行一哥疑似被挖角
航空業向好，機師出現挖角潮，政府飛行服務隊機師被撬走，該隊總監「飛行一哥」陳志培都「疑似」成挖角對象。記者問佢有冇畀人挖角，佢笑住答：「呢個比較尷尬，呢個比較尷尬！」不過做高級公務員轉工要過冷河，都有啲煩。總之有冇人嘗試「接觸」，睇嚟不言而喻。
隊員轉工「唔見」三千萬
挖角潮令陳Sir好頭痛，佢話未來廿年亞太區航空業求才若渴，波音公司估計需求十八萬機師同廿五萬維修人員，近三年度飛行服務隊就走咗六個機師，粗略計訓練費差唔多成三千萬㗎！
佢慨嘆，訓練一個機長要十至十二年，走只要一個月通知，有人仲急到賠錢走，年資十年嘅機師，政府人工每月約七萬，外面就約十二萬，仲有花紅。未來一年係關鍵期，事關資深人員將臨近退休可以攞長俸，多數會留，但係強積金制年輕機師會點？佢就睇唔通嘞。
卓妮