中環出更：曾詠芝扮難民兒童驚到震
○八年加入香港女青年商會嘅曾詠芝（Winnie）今年坐正做會長，就職八個月，佢話最難忘就係早前搞嘅模擬難民營，佢要扮一個十二歲中東難民兒童，喺難民營生活，唔止要排隊攞糧食，仲畀啲軍人用槍指住個頭，真係驚到震。
不過Winnie就話呢個係一個好好嘅體驗，令佢更加覺得要幫助身邊嘅人。
商會同聯合國難民署合作搞咗個難民體驗營，有人扮軍人、亦有人扮難民，Winnie就扮十二歲嘅中東細路女，大熱天時都要戴晒頭巾。
排隊攞糧食畀槍指嚇
喺模擬難民營入面，食嘢要排隊，唔止排隊攞糧食，攞糧食前仲要排隊攞個兜裝住啲食物。咪以為啲糧食唔使錢，軍人會收錢之餘，見你身上有靚錶靚飾物都會搶埋，你唔畀分分鐘用槍指住你。
Winnie話雖然個活動只係幾個鐘，但令佢好心酸，覺得喺難民營生活嘅人好似冇希望、冇明天咁。諗到香港有啲「八十後」郁吓話跳樓，覺得大家應該放眼世界，諗吓點可以幫到社會。
卓妮