常停鹹水房署玩殘住戶
鄭先生（化名）居於葵涌邨芷葵樓，發現過去六年鹹水供應經常間歇性暫停，「呢度入咗伙得嗰幾年，但係鹹水管就一直有問題，搞到成日都要用食水沖廁，真係畀房屋署玩死！」鄭要求房署改善鹹水供應系統，避免浪費食水。
當區區議員黃潤達指曾接獲約八宗芷葵樓及逸葵樓居民投訴，認為房署須加快維修鹹水管進度，「始終居民用食水沖廁，唔多唔少一定用多咗水，房署點都要搞番掂個問題！」
房署發言人證實，過去一年芷葵樓共有二十次停鹹水供應事件，每次暫停鹹水，辦事處均會在大堂張貼通告，通知受影響居民。緊急暫停鹹水供應原因包括爆喉、壞泵及住戶室內維修等。每宗維修個案均有致力盡快處理，大部分均可以在即日或翌日完成，以減低對居民造成不便。