哎吔吔，原來入境處職員係咁呆頭呆腦，簡直係一支黐黐地嘅低能膠，萬一有不法分子利用漏洞出出入入，真係唔知點算好呀！
入境處人形低能膠有幾戇居？人哋有鬚就當老竇，佢哋有證就當阿仔。件事係咁嘅，有一位三十三歲姓林港男，前一排由深圳陪同中風坐輪椅嘅爸爸回港，由於透過傷殘人士通道辦理手續，所以當時手持父子兩人嘅身份證過關。正所謂忙中有錯，林先生過關之後唔覺意將兩張身份證調亂。送咗爸爸去屯門一間安老院之後，林先生凌晨時分獨自經落馬洲邊境管制站過關，打算去深圳消遣，因為嫌ｅ道人多，咪走去傳統通道囉。咁就出事嘞，林先生出示嗰張身份證其實屬於爸爸嘅，自己固然懵然不知，入境處職員居然發雞盲照樣放行！
喂喂喂，兩父子年紀相差三十年，一個老，一個嫩，傻嘅都應該睇得出身份證照片同真人有分別啦，把關士卒有乜可能懵到上心口睇漏眼？林先生其實已經成功過關，不過當佢將身份證放落銀包嘅時候，當堂嚇咗一跳，發現用嘅唔係自己身份證，回港之時容乜易好人當賊辦。所以咯喎，林先生自動投案，即刻返轉頭通知相關人等。哈，擺咗個超級大烏龍嘅職員又滑稽喎，佢神色緊張慌失失向上級匯報係咁講嘅：「我發現張身份證唔係佢本人。」呢啲就係公務員最擅長嘅是非對錯大挪移，明明係自己做錯事而對方主動糾正，佢講到係自己英明神武發現新大陸。
跟住落嚟就麻煩嘞，又要入房扣查，又要核實身份，左搞右搞之後，入境處提出一個解決辦法，要求林先生半夜三更去安老院摷醒爸爸簽署授權書，再帶同自己身份證折返落馬洲辦多一次出境手續。各位請記住，林先生去安老院期間係冇身份證㗎，萬一遇到警察查證，話唔定又係一身蟻。
講到呢度，功夫茶成身猋冷汗。你知啦，乜獨物獨嘅恐怖組織好鬼死毒，深圳家陣正在舉辦世界大學生運動會，如果有人肉炸彈之類嘅恐怖分子利用他人身份證成功過關，後果不堪設想！
嗱，唔好話功夫茶唔提醒入境處，港境把關非常之咁重要，絕對唔容許再擺烏龍。事關京官好鍾意亂扣帽子㗎，入境處職員睇漏眼等同危害祖國安全，唔知會放咗乜嘢牛鬼蛇神入內地，假如北大人一怒之下大興問罪之師，淨係一條「顛覆國家政權罪」已經足以玩殘曾蔭權政府！
講真吖，如果真係視力障礙發雞盲，功夫茶建議入境處處長陳國基帶頭去驗眼。