政情：長毛踢波十分鐘收皮
男性立法會議員當中，差唔多個個都係捧住個肚腩開會，要數平日常做運動嘅，社民連梁國雄算係少數之一。不過長毛嘅身形都與日俱增，尋日佢客串作為「無家者世界盃」嘅隊員時，同甲組足球隊深水埗同場競技，但踢唔夠十分鐘，長毛就喘晒氣，即刻向場邊揮手示意要求換人。
以往長毛喺綠茵場上奔馳時，長髮髮尾隨風飄起，但今時唔同往日，尋日嘅長毛，喺場內行行企企十分鐘已經索晒氣，佢肚腩顯現，可能就係跑唔郁嘅鐵證。佢事後話，自己平時都有練波，只不過對手係甲組隊，先至令佢上氣唔接下氣喎。
講番呢個「無家者世界盃」，其實係為一班無家可歸人士而設嘅比賽，今年喺法國巴黎舉行，香港亦有派人出戰。雖然長毛唔係無家者，不過佢都算唔話得，自資幾千蚊買機票，專登飛過去巴黎同港隊打氣。佢話自己過到嗰邊唔會落場踢，其實無咩作用，只係希望自己飛埋去，傳媒會多啲關注呢次賽事喎。