政情：林雨陽着吊帶博出位
選民力量尋日安排「星屑醫生」歐陽英傑落黃埔宣傳，擺明挑戰現任區議員、早排發表懲罰選民論而備受千夫所指嘅「鼠王芬」梁美芬，以及打算單挑梁美芬嘅民主黨新星黃碧雲。星屑醫生尋日同班兄弟落去紅磡派傳單，選民力量主席林雨陽仲以一身吊帶Look撐場。
林雨陽話，自己近排喺南區海怡西選區工作，挑戰民主黨中委馮煒光，由於地區工作時間短，為咗畀選民認識佢，決定由前日開始日日着吊帶，務求突出自己形象，等選民容易記得佢咁話，原來佢讀小學已經會用吊帶，所以唔覺得特別喎。
由於天氣實在太熱，一班選民力量成員派傳單派咗冇幾耐已經汗流浹背，就連林雨陽都笑言自己年紀大，派一陣就索晒氣。星屑醫生就唔同喇，雖然不斷嗌咪，不過佢笑言自己正正因為大汗，所以先至唔會中暑，尋日仲有一個女粉絲特登由九龍東過去搵佢簽名，相信醫生一定心都甜晒。