政情：阿Paul落區遭青年狙擊
旅遊界立法會議員謝偉俊(Paul)近排把握住外傭居港權訴訟呢單咁受港人注意嘅事件，連日蒐集市民簽名，據講至今已經有接近兩萬個網民喺網上簽名。阿Paul尋日落到紅磡區繼續蒐集市民簽名，不過就畀一班社會主義行動嘅年輕人狙擊，情況都幾尷尬。
坊間一直盛傳阿Paul有意參加直選，佢尋日聯同九龍城區區議員張仁康一齊搞咗個反對外傭獲得居港權嘅簽名活動，阿Paul仲話自己未諗掂係唔係參加直選，依家各個區都走吓，睇吓反應先。點知話口未完，十幾名社會主義行動嘅年輕人就喺佢旁邊大叫口號，批評阿Paul搞種族歧視。
雖然狙擊行動都幾激烈，雙方互相指罵，期間阿Paul嗰邊有位支持者跌倒，但應該就唔係畀人推跌嘅。現場所見，大部分街坊都比較支持阿Paul，雖然社會主義行動成員不時指罵阿Paul，但佢就一於少理。啱架喇，如果真係要直選，呢啲場面真係要習慣吓。