政情：政黨搞Apps市民唔Like
美國總統奧巴馬喺○八年競選總統時，首次以社交網站作為競選平台，成功吸引一向政治冷感嘅年輕選民投票支持，香港兩大政黨民建聯（民記）同民主黨（白鴿黨）前仆後繼「跟風」，各自開發屬於自家政黨嘅Apps，並趕及喺區議會選舉前面世冧選民，好可惜初步睇嚟反應真係好一般，因為超過九成嘅意見都係趁此機會向佢哋大鬧特鬧，兩大政黨可能都要諗計扭轉呢個局面，否則到時「偷雞唔到蝕把米」就喊都無謂喇！
留言後即刪除程式
iPhone手機風靡全球，iPhone App更係大行其道，民記即時趕時髦，率先喺本月五日設立「社區報料iPhone App」，等市民可以隨時上載照片投訴報料。畀民記搶咗頭啖湯嘅白鴿黨，突然喺五日後火速開咗個官方App，但就無好似民記咁大鑼大鼓公告天下，完全唔似泛民主派嘅一貫作風。有白鴿黨核心解釋，其實佢哋早就想設立官方App，只不過申請嘅過程好耐，最近先正式搞掂喎，真係信不信由你喇！
民記同白鴿黨度橋取悅選民，但初步睇嚟完全唔Work，因為大部分有下載呢兩個Apps嘅用戶，留言時都鬧爆兩個黨昔日嘅所作所為，其中尤以民記更被鬧到體無完膚，有市民揶揄時常「成功爭取」掛在嘴邊嘅民記，「成功爭取綠燈公仔延長兩秒，成功爭取狗糞收集箱，成功爭取北極有企鵝」，另有市民更直斥民記最無恥，所以自己下載個App係為咗畀意見，寫完後就即刻刪除，費事整污糟部電話喎。
白鴿黨亦都唔好得去邊，用戶嘅意見雖然唔多，但依然火力十足。有市民狠批佢哋支持二○一二政改方案，簡直就係呃選民，而且關鍵時刻出賣香港，真係人神共憤，揶揄白鴿黨根本同民記無分別。
話時話，民記同白鴿黨突然緊貼潮流，講到尾都係想為今年明年兩場選舉提早鋪路，希望投其所好，到時「八十後」嘅票就自然手到拿來，但依家兩黨既得不到「八十後」嘅欣賞，仲要自設多一個平台畀人翻舊帳鬧爆，真係典型嘅貼錢買難受。如果有機會畀佢哋再揀多次，佢哋會否「停一停，諗一諗」，考慮寧願多一事不如少一事，搞少啲花臣呢？