中環出更：張佐華施榮恆 處男獻唱
如今做慈善機構主席，除咗睇得、打得，仲要唱得。東華主席張佐華下月將為「愛心滿東華」籌款騷，同副主席施榮恆（Ivan）一齊獻出第一次，登台唱出歌神許冠傑名曲，呢排連搭車、沖涼都會練歌。
為籌集免費醫療服務經費，Ivan擔大旗，做籌委會主席。佢搵嚟廣華名醫樂隊Band One，同張主席夾Band唱歌。
同廣華名醫夾Band
九月二日就公演，上周大家拉隊去廣華Band房練歌。Band One成立五年，隊長係廣華病理部主管許伯君，仲有神經外科部門主管郭正光醫生。初次夾Band，大家出奇地啱Key。張主席同Ivan試唱《浪子心聲》、《天才白痴夢》等，有唱家班水準。Ivan原來係Sam許粉絲，金曲早已琅琅上口，佢仲自爆唱歌秘技，就係上台前飲少許紅酒或白酒，放鬆喉嚨，把聲就會特別靚。
張主席就不忘為廣華賣廣告，佢話十月九日係廣華一百歲生日，屆時將有世紀生日派對，請齊曾喺廣華出世嘅市民齊吹蠟燭。數數手指，由一九三七年至今，有逾六十三萬人喺廣華出世，即係話每八個香港人之中，就有一個係廣華BB。想參加派對嘅「廣華人」，快啲聯絡東華嘞。
卓妮