中環出更：劉晉最怕港人玩iPhone送飯
美食當前，好難抗拒。不過，中國人對食材相當博愛，有啲食物，的確人見人怕。供應家常風味廣東菜嘅「留家廚房」老闆劉晉話，最怕食物唔衞生，佢爸爸劉健威就抗拒螄蚶同雞泡魚，食品公司老闆姚麥麗敏最驚食野味，飲食達人余健志就話，連鵝肝都唔敢食。
美食博覽尋日喺會展舉行「星級名廚示範」，城中廚神現身，劉晉出身飲食世家，示範四十五分鐘煮五道菜，易過食生菜。劉晉愛食出人情味，每次去旅行，首選逛街市，走入書局，都係搵食譜。佢認為，每餐飯都係神聖嘅，最怕見到香港人一邊食飯一邊玩iPhone，話咁就最無癮。
佢爸爸劉健威本身就係食家一名，但有兩樣食物一定唔食，就係螄蚶同雞泡魚。劉健威話，獅蚶帶有唔少寄生蟲，曾有朋友生吃螄蚶後生病半年，後來仲過埋身，至於雞泡魚，佢曾經冒險喺番禺食過，後來有朋友提醒，話日本每年都有攞咗牌嘅劏雞泡魚師傅中毒身亡，一言驚醒夢中人，從此唔敢再食嘞。
至於余健志，佢話自己投身飲食業後，開始發現一啲食材背後嘅真相，之後就好多嘢都戒咗，例如鵝肝，係填塞鵝隻嘅腸胃而成，過程好唔人道，魚翅嘅來源有損海洋生態，髮菜嘅採摘對土地有害，鹿茸嘅割取又頗為殘忍，藍鰭吞拿魚又會加深物種滅絕嘅危機，所以已經統統喺佢嘅飲食名單刪除。
姚麥麗敏食狗感內疚
整糕點出名嘅飲食大師江獻珠第一大弟子、「大師姐」姚麥麗敏示範炮製子薑牛柳粒及桂花蛋。大師姐自爆最怕食野味，內地熱爆嘅果子狸、貓頭鷹、貓肉、狗肉等，統統咪搞。佢透露，年輕時被友人氹食狗肉，感到好內疚，發誓呢世都唔會再食。
卓妮