未入正題前，先問大家一個問題，如果有人向你推銷一架車，但係資料唔齊，又唔准試，你肯唔肯買呢？答案唔使講嘞啩。
唔係講笑㗎，香港真係有咁荒謬嘅事。呢，機管局早排推出興建第三條跑道嘅諮詢文件，但好多資料欠奉，連最重要嘅環評報告都冇。機管局主席張建東話喎，因為法定環境評估最少需時十八個月，涉及資金超過一億元，所以必須等市民就興建新跑道達成共識先至做，唔係嘅話，可能會浪費資源。
咁就真係好笑嘞，未有環評報告，又點會有共識吖？一句講晒，機管局根本就係本末倒置。大家都知，增建跑道爭議多多，最令人擔心就係對環境嘅影響，機管局連環評報告都未做，點樣說服市民呢？一項涉及過千億元嘅大型基建，未做環評就要求市民達成共識，仲有冇兒戲啲吖！
為咗推銷第三條跑道，機管局又呃又氹乜都出齊，一時話現時機場容量幾年後就爆滿，一時話起新跑道對環境影響唔大，仲承諾會盡量減低負面影響添。
其實，講多無謂，食多會滯，係人都知起跑道一定會破壞環境生態，到底損害有幾大，機管局又有乜嘢措施補救，應該清清楚楚話畀市民知，點可以咁求其㗎。
大家不妨想像吓，如果市民求求其其達成共識，又求求其其支持興建新跑道，結果環評報告一出，對環境嘅破壞原來好得人驚，到時機管局又點因應呢？係推倒重來，定係霸王硬上弓呢？咪話功夫茶篤爆呀，機管局急不及待推出諮詢，又急不及待要求市民達成共識，無非係想造成既定事實，霸王硬上弓啫。
不過，市民眼睛係雪亮嘅，冇咁易上當。興建第三條跑道唔係唔得，但一定要按照程序，做足評估，否則隨時跪低，咁就真係浪費資源啦。呢，港珠澳大橋環評被推翻，唔通當局仲未吸取教訓？
仲有呀，除咗環保爭議，社會對新跑道嘅經濟效益亦有好多質疑，雖然機管局吹到天花龍鳳，話新跑道可以吸引幾多幾多客流貨流，創造幾多幾多職位，但唔少專家批評，有關預測及數字過於樂觀，不盡不實，漏洞多多，隨時令新跑道淪為大白象工程。
所以呢，機管局要市民達成共識，唔止要攞出環評報告，仲要進一步評估經濟效益，千祈唔好博大霧吖！