現在為官者太把自己當回事，好似派六千元拖咗半年，終於本月底為六十五歲以上長者登記喇，之不過，最快十一月才收到錢。面對「低增長、高通脹」的環境，財金高官堅稱有關時間已盡量壓縮。要是唔「壓縮」，睇怕夕陽政府收山，嗰六千蚊都未能派出。
從小小的一件事，就反映政府唔係急市民之急。為了配合京官訪港，添馬艦政府總部就日夜趕工，好讓特首及時搬入，京官剪綵，而六千元派足成年，長者才可到手。學者都指出，基於通脹上升，市民愈遲收錢，六千元的購買力愈低，十一月收到錢實質係貶咗值。又有長者團體批評，當局的派錢安排失當，無吸取派平安米混亂的教訓。
再者，不理民間聲音直接入長者生果金戶口，係都要啲老人家拄着拐杖甚至坐着輪椅前去銀行登記，此舉是否可製造「悲壯效果」？話畀全世界知：你睇政府幾慷慨幾關心老百姓，有六千蚊過新生活或做冬喇！
人稱「山西王」的辛亥人物閻錫山，其日記有則教人改錯：易犯甚麼錯的人，應時時提防犯甚麼錯。這比如瞎子牽驢，不敢鬆手，一鬆手就跑了。只要不鬆手，慢慢的由勉強而自然，由自然而熟悉，由熟悉而快樂，自然可將向來犯的錯去盡，去盡之後，即如海闊憑魚躍，天空任鳥飛，任他跑去可感到無比的快樂。
然而，呢個政府明明盲懵懵，還要扮天眼通，嘻皮笑臉扯着驢尾巴，卻當了是初戀情人的秀髮，撫之疼之，驢不勝其煩，一腳踢之落懸崖。