阿涂當初唔想參選區議會，原因之一係佢太太嘅預產期撞正區選投票日，令佢分身不暇。雖然好忙，佢都成日抽時間陪太太行街買定啲嬰兒用品，之但係花多眼亂，揀咗兩個月都未買齊，但就有另一收穫。事關有次佢喺某大型商場嘅洗手間，見到有個細路唔夠高開水龍頭，就幫個細路開，發現個細路下巴貼住洗手盆嚟洗手，雙手又唔夠長㩒唔到梘液，就求其捽兩下算數，真係乾淨極都有限。
阿涂其後向該黨兩位已為人父嘅區議員偷師，兩人都提到帶小朋友去洗手間嘅難題，阿涂覺得呢個議題有得發揮，就聯同佢哋一齊做咗個兒童洗手間設施調查，為市民兼為自己。