政情:陳家偉風騷現身食飯

因為去香檳大廈「訪談」而辭去民主黨總幹事職位嘅陳家偉,消失一排之後最近已經返咗香港,前晚仲約埋三、五知己,去到新蒲崗一間酒樓食晚飯。陳家偉全程笑笑口,睇落完全冇受「訪談」醜聞影響。同枱除咗陳家偉之外,仲有一位相信係前民主黨區議員嘅男士,兩個仲傾得好開心添。

前晚七點半左右,陳家偉同埋兩男一女一行四人,去新蒲崗一間酒家開餐。現場冇乜人認得佢,所以佢表現得相當輕鬆自在,滔滔不絕咁同朋友傾偈,仲不時發出笑聲,好似已經走出「訪談」醜聞嘅陰霾。

同枱除咗陳家偉外,仲見到一位懷疑係前民主黨區議員劉定邦嘅男士。劉定邦曾因區議會津貼問題畀廉政公署檢控,後來獲法庭判冇罪釋放,但喺○七年區議會選舉輸畀一位獨立議員。如果呢位男士真係劉定邦,兩位曾經滄海嘅人一定有好多嘢分享,唔怪得食咗咁耐啦!

「Money18免費即秒股票報價網站」現推出8升級功能,財經資訊,實時實發!