政情：鄧耀邦：太太再懷孕先咁激
「舖王」鄧成波嘅四仔、東華三院總理鄧耀邦（Jason）同太太Joni前日雙雙危坐屋企窗台，結果搞到要報警解決。當事人Jason尋日同我哋講，太太生完BB冇幾耐，近日再度懷孕，懷疑因為咁搞到賀爾蒙失調影響情緒，所以先至會咁激動，並非產後抑鬱。至於Jason嘅爸爸波叔，據講前日知道事件後並無過分緊張，反而仲同朋友打麻雀添。
讚妻性格溫順
Jason好保護太太，尋日猛讚太太平時性格溫順，又話太太知道前日件事鬧大咗之後，內心已經好過意唔去，但幸好心情已經平復，佢話會盡量抽時間照顧太太，遲啲仲會搵機會去旅行放鬆吓。對於有傳話Joni唔鍾意Jason繼續讀中醫以致發生爭執，Jason就話自己已經完成中醫課程，嚟緊會專注東華三院嘅總理工作，以及跟爸爸學做生意。
我哋尋日亦搵到Jason嘅細佬鄧耀昇（Stan），Stan暫時未去探阿哥兩公婆，但佢話聽媽咪講，兄嫂已經冇事，Jason仲已經如常上班工作添；佢仲透露，爸爸前日知道件事後，亦無過分緊張，之後仲去同朋友打麻雀添！Stan又提到，平時見阿哥對大嫂都好好，兩夫婦好恩愛，阿嫂生完BB後亦冇工作，希望阿嫂好好休息咁話。