政情：愛鯊葛珮帆 呼籲少食翅
茹素多年嘅沙田區議員葛珮帆（ＥＱ），近年鍾情潛水活動，同大自然接觸。尋日佢喺馬鞍山舉辦咗一場海底攝影展，大騷過去兩年，佢喺南極同巴哈馬群島海底影落嘅鯊魚相，親證鯊魚其實對人好善良。ＥＱ計劃出年再度下海，呢次嘅目的地係菲律賓，而目標就係鯊魚中嘅巨無霸：鯨鯊。
ＥＱ上山下海，捕捉咁多鯊魚美態畀大家欣賞，目的原來係呼籲大家少食魚翅，拯救呢種瀕危動物。佢尋日展出嘅十多張作品，幅幅都達到專業水平，不過佢謙稱其他攝影師嘅先至係專業，當然包括佢老公Henry嘅作品啦。尋日Henry就充當ＥＱ嘅攝影師，幫滿場飛嘅太太影相留念。
雖然ＥＱ忙於應付今年底嘅區議會選舉，不過佢已經計劃好喺出年三月至四月，再去菲律賓影鯨鯊，而且會帶埋一班中學生同行，希望將護鯊訊息傳遞畀年輕人。ＥＱ呢批攝影作品將會喺新界東巡迴展出，除咗馬鞍山，今個月中會喺將軍澳同沙田展覽，大家得閒不妨去睇吓。