中環出更：徐蒝望延續街頭飲食文化
當大家爭論香港係咪「成也英國，敗也英國」嘅時侯，創意名廚徐蒝就認為香港菜多年受到英國影響，發展不如鄰近地區咁精彩，仲慨嘆本港富有特色嘅街頭飲食文化漸漸消亡。徐蒝建議香港不妨倣效新加坡及馬來西亞，畀啲攤販一個合法嘅戶外場地經營飲食，重現以前大笪地嘅熱鬧境況，以延續街頭飲食呢種文化特色。
美食博覽 示範「魚香茄子凍」
徐蒝尋日喺灣仔美食博覽中一展身手，示範一道「魚香茄子凍」的菜式，其清爽宜人一改魚香茄子煲熱騰油膩嘅印象，令人拍案叫絕。徐蒝經常鑽研飲食，並就何謂香港菜而思索，佢覺得香港既然係中西交匯地，咁Fusion（融合）就係香港菜餚特色，但好不幸，以前管治香港嘅英國，喺一眾殖民帝國之中最唔識食嘅，好似餐肉腸仔蛋呢啲英式飲食，就成為香港早餐主流。
反觀澳門受到葡萄牙影響，造就澳葡菜系大放異彩，而曾經係殖民地嘅越南，其菜式亦滲入法國風情而令人津津樂道。假若當時換上意、法等國來開埠，徐蒝話今日嘅香港菜肯定妙不可言。