中環出更：霍啟剛官恩娜睇「貓紙」撐大運
深圳正在舉行世界大學生夏季運動會（大運會），機會咁難得，唔少城中大忙人都穿梭兩地，畀足面撐場。好似霍英東家族嫡孫霍啟剛，前日親自入場睇開幕，尋日朝早又現身喺喇沙書院舉行嘅「全港學生撐大運」活動，誓師後即刻率領過千名本港青年學生浩浩蕩蕩北上觀賽，全情投入精神可嘉。
今次活動搞手係啟剛及全國青聯常委吳傑莊（Johnny），而香港青聯副秘長詹勝就幫手做統籌，尋日活動由名譽主席梁愛詩主持授旗儀式，星級大使官恩娜亦到場支持。
期間發生咗件小插曲，當台上嘉賓高呼一連串口號嘅時候，唔知係咪突然忘記口號，中途忽然靜默咗幾秒鐘，搞到啟剛都忍唔住大笑指住台下嘅提示牌，意思係話大家有「貓紙」提水都唔識讀？
吳傑莊撲籃球決賽飛
啟剛同Johnny都視大運會係培養體壇明日之星嘅搖籃，所以好享受觀賞賽事。啟剛話最鍾意睇游泳項目，而Johnny就鍾意睇籃球，仲話要諗辦法撲決賽戰門票，事關賽事精彩程度唔比美國職業籃球賽（NBA）差，事關好多NBA球星都出身於美國大學生籃球聯賽（NCAA），同樣瘋迷籃球嘅詹勝好有同感，都話要撲飛喎！
講番大運會開幕當日，除咗啟剛同Johnny入場觀禮外，菁英會主席洪為民、副主席楊華勇、香港青聯副主席鄭重科都喺度。啟剛話，雖然開幕禮嘅節目唔夠北京奧運會咁壯觀，但都好精彩。洪為民就話最難忘係小提琴表演部分，總之前晚節目令到天氣悶熱帶來嘅不適一掃而空。
卓妮