香港房屋種類五花八門，最有權嘅梗係住禮賓府啦，最有米嘅當然住半山區，窮到燶又冇資格上樓住公屋咯喎，咁就要屈就劏房或者籠屋。曾蔭權講過o架，香港不存在冇瓦遮頭問題，所以瞓天橋底都算得上有瓦遮頭。
至於中產階級，最正路嘅住屋形式係私樓或者居屋。之不過咁，人人都會老，當你七老八十嘅時候，有幾個錢傍身嘅你會選擇乜嘢居住環境呢？其中一個選擇就係俗稱「富貴長者屋」嘅長者樂安居計劃，理論上可以住過世。
富貴長者屋原本嘅構思唔錯o架，中產長者只要一次過繳付幾十萬元租住權費，咁就有資格入住，一直住到百年歸老，入住期間淨係要每個月交管理費啫。如果係三百幾呎單位，管理費大概每月八百元，五百幾呎就一千二百元。
講到呢度，大家可能會問，功夫茶到底想講乜呀？係咪想介紹即將退休嘅一眾司長局長入住富貴長者屋？非也非也，功夫茶想講嘅係，當一個大業主計錯數嘅時候，往往會累到老人家一殼眼淚，隨時棺材本不保。
呢嗱嗱嗱，實情係咁嘅，長者屋嘅大業主係房協，可惜因為管理不善而年年蝕大本。以牛頭角彩頤居呢一個長者屋為例吖，每年虧蝕五百萬元，過去五年錄得二千五百萬元赤字，不斷補貼嘅房協終於頂唔順，要求向租戶加收管理費百分之五。你知啦，住得長者屋幾乎無一例外都係零收入嘅退休人士，日常生活開支全靠上半世含辛茹苦賺落嘅積蓄，你一話要加管理費，公公婆婆即刻大失預算，坐食山崩恐怕提早出現。
好嘞，彩頤居租戶走去申訴專員公署投訴，而調查過後公署又認為投訴成立。公署話呀，房協徵收額外管理費有違長者屋計劃嘅原意，無法達到安居樂嘅目的，租戶會陷於進退維谷嘅兩難局面。公署仲話，房協應該增加管理透明度，避免將營運虧蝕轉嫁到租戶身上。
簡單咁講，房協自己管理不善導致蝕錢大出血，竟然密謀榨乾退休人士棺材本，你話係咪冇道理吖？人哋一心以為入住長者屋可以安享晚年，點不知管理費有不斷上升嘅潛在危機，雖然話有幾個錢傍身啫，咁都冇理由任得你蠶食吖嘛。打個譬喻，萬一特區政府管理不善導致庫房空虛，唔通任得財爺曾俊華加稅？納稅人即使有錢都冇義務幫敗家仔填氹！
所以話啫，煩請房協急急如律令，盡快縮番隻魔爪，唔好再打公公婆婆嘅荷包。要你敬老呀，唔係虐老呀，趁七月鬼節積番少少陰德啦，唔該！