勞福局局長張建宗日前出席立法會議員王國興地區辦事處的開幕禮，大派高帽。既然嚟得，講幾句美言亦屬平常，之不過做得高官，點都應有啲胸襟。話說張建宗笠完高帽，竟乘機放冷箭，暗踩有某些議員「無的放矢」，咁嘅心態，即係話畀其他人知佢係「偏聽則暗」的信徒，做高官心胸眼界咁窄，自然不會領略「凡攻我之失者，皆我師也」的至理。
立法會議員論政，無論是鞭撻政府抑或批評政府，也只是重視自己的本職，這本是天經地義的，根本毋須另加讚美；反之，作為高官，暗踩議員「無的放矢」，那就失了身份，也不是當問責高官應有的態度。
高官只聽片面之詞，根本連「做好份工」的要求也達不到。毛澤東話：各種經驗，都要吸取，不要用一個規格到處套。推而論之，各種批評，都要吸取，不要用一個標準自以為是。
氣象界有一句名言：當你做對了，沒有人會記得；當你做錯了，沒有人會忘記。張局長是否仍真正關心普羅打工仔，老朽唔敢「無的放矢」，但佢作為問責局長，甩漏真係唔少，較遠嘅免外傭稅事件，畀人鬧佢拎住核子彈嚇議員；近期嘅「鼓勵就業交通資助計劃」，又不肯聽民意，一味要以家庭為單位，完全違反「鼓勵就業」原意；又如最低工資立法，指引唔清晰，勞資在「飯鐘錢」和「休息日」拗餐死等等。
其實，議員啲批評多是「有的放矢」，豈料張局長不自省且善放暗箭，如此胸襟小家之至。