政情：建築工人妻投訴煲呔曾
當大家以為特首辦喺星期一大鑼大鼓搬去添馬艦嘅時候，我哋收到可靠消息，其實新特首辦金玉其外、敗絮其中，內裏根本仲有好多嘢未搞掂，但為咗配合國務院副總理李克強來港為新總部揭幕，煲呔曾要建築工人通宵達旦趕工，搞到工人嘅家屬都扯火鬧爆佢。
消息人士話，煲呔曾自己間房啲傢俬都係前日先至送到去新特首辦，就連佢老婆曾鮑笑薇間房都一樣未搞掂。消息仲話，煲呔曾過去一連兩個星期日，公然走入新總部視察，期間化身百彈齋主，不時指指點點，諸多要求，講完之後當然所有人又要做多好多工作配合啦！
有工人家屬不忍老公為咗趕建新總部，聲言丈夫兩個月來連假都無放過，近排更加晚晚做到午夜先至收工，就連飯都無時間食，搞到不似人形，體重驟減三十磅，就算病都無時間睇醫生。呢位女士仲大鬧煲呔曾，話人心肉做，點解為咗趕及喺立法會新大樓宣讀施政報告，就要收買工人人命呢？