政情：肥胡為袁莎妮爆瘀事
政務司司長唐英年嘅前度「得力助手」袁莎妮（Shirley）自從獲香港總商會委任做總裁後，一直都未同傳媒見面，主席胡定旭（肥胡）尋日出席港台經濟論壇時，主動同在場記者介紹呢位新上任唔夠四日嘅總裁，而且仲自爆瘀事畀記者知，好明顯就係護花心切，唔想大家問啲敏感問題，做老闆做到佢咁都算唔話得！
肥胡尋日一見在場傳媒即時爆料，話自己普通話唔耍家，尋日要代表總商會致詞十分鐘，全程都要用普通話，搞到自己事前都有啲擔心喎；佢仲話，為咗唔想出醜人前，演講前特登搵啲普通話好嘅同事同佢一齊練習喎。
肥胡不惜自爆瘀事，原來只係想掩護新愛將Shirley，佢介紹Shirley畀大家認識時不斷話大家合作愉快、而且合拍咁話，而Shirley就更加繼承咗官場少說少錯嘅金科玉律，全程只係企喺肥胡旁邊，一於唔講咁多，唔搶佢個肥主席嘅風頭。