政情：鬍鬚曾辦事似太空「慢」步
俗語話「面係人哋畀、架係自己丟」，財政司司長曾俊華尋日就演活咗呢句說話。佢做榮譽主席嘅港台經濟文化合作協進會，專責同台灣搞好互惠互利措施，但成立咗一年多，尋日先正式同台灣嘅策進會開第二次聯席會議，效率勁低，但鬍鬚曾似乎覺得自己好威，竟然話過去嘅成果，就好似首位登月嘅美國太空人岩士唐咁，雖然係一小步，但就係兩岸人民嘅一大步。講完仲要完全唔面紅，司長你真好嘢！
雖然中央已經開咗綠燈，但協進會同策進會差唔多一年先開得嗰一次會，下一次會議，更已經要等到下年至開得成，進度直情慢過老鼠拉龜。但鬍鬚曾就講到自己好似偉人咁，無咗佢港台關係就會停滯不前。佢尋日話佢嘅工作成果，就好似當年岩士唐登月咁，有着好深遠影響，「係港台關係一小步、兩岸人民嘅一大步。」
明明鬍鬚曾做咗好少嘢，但佢就索性將成果誇大，呢一招厚顏領功，係佢先至做得出。大家仲要唔好忘記，岩士唐登月已經係四十幾年前嘅事，鬍鬚曾今時今日仲用呢個例子，已經不合時宜，唔通佢想台港關係要再過幾十年，先至可以成功推動咩？
鬍鬚曾講完後就到策進會董事長林振國發言，林振國只係講咗簡單幾句但就處處玄機。佢話呢兩年係完成咗「不可能的任務」，形容台港關係就好似一場球賽咁，香港同台灣都各有入波。言下之意，咪即係話到現時為止，都未知邊個先係輸家贏家囉。
煲呔曾懶理台方邀請
對於處理台港關係，香港班高官向來闊佬懶理，人哋台灣策進會已經多次當面邀請煲呔曾訪台，但煲呔曾仍然無回覆人哋，林振國尋日被記者問到口啞啞，問佢會唔會再請煲呔曾訪台時，佢都講到無乜癮，話其實上年已經發出邀請，但嚟唔嚟都唔係台灣話到事，要由煲呔曾自己決定。在場嘅政制及內地事務局局長林瑞麟回應話，雖然特首講過任內想去台灣一次，但最終能否成行，要睇時機。煲呔曾任期不足一年，要睇時機，咪慢慢睇囉。