中環出更：名人食家最愛蝦餃王
香港之所以有美食天堂美譽，中國飲食文化居功至偉。為咗宣揚美食及提升業界水準，旅發局近年搞咗個「美食之最大賞」，今年比賽尋日起一連兩日喺薄扶林道中華廚藝學院舉行，先進行「點心」和「羹」組別比賽，請咗馬會大董葉澍堃（Stephen）、美食家韋基舜、飲食達人余健志（Jacky）及立法會議員陳淑莊（Tanya）等擔任評判。
講飲講食 各有心得
參與今次比賽嘅十支隊伍，要喺指定時間及成本內，炮製蝦餃、炸焗類鹹點同甜品，其中「譽宴」就連中三元，奪得「蝦餃之王」、「甜品創意大獎」及「至高榮譽金獎」。首次擔任美食評判嘅Tanya，話睇見啲師傅嘔心瀝血徒手製作，十分欣賞。自認係茶樓常客嘅Tanya，好鍾意食蝦餃同炸雲吞，只要係傳統點心，佢都難以抗拒。
另一位評判Stephen都鍾意食蝦餃燒賣呢啲傳統點心，佢認為蝦餃要講求鮮嫩多汁，面薄底厚，好似有啲師傅喺餡皮整十幾個摺，真係考功夫。對於時下標榜新潮同創意嘅點心款式，Stephen就有啲保留，因為傳統點心流傳至今，定必有其存在價值同實力。
身為點心組總評判嘅韋基舜都憶述，五、六十年代嘅點心係好的骰，反觀現時流行抵食夾大件，點心嘅體積比以前幾乎大上一倍，令佢覺得從前上茶室係雅致嘅，反而依家上茶樓就只係為咗充飢。
不過，Jacky就認為製作食品一定要有創意，如此才可進化及改良，況且飲食無話正宗與否，只有好味道至係大家都認同嘅。Jacky比較偏愛鹹味點心，佢話中式甜點大多係糕點同糖水之類，容易飽滯之餘變化亦較少，不及鹹點咁多姿采喎。
卓妮