香港愈來愈倚重旅遊業呢一碌經濟支柱，不知幾多人靠外來遊客開飯，理論上當然應該以客為尊啦，正如宣傳片話齋，好客之道，又點少得你。之不過非常不幸，香港有好多存心不良嘅奸商，奸到出汁專門搵遊客笨，一個二個以客為豬，好客之道變成宰客之盜。
宰客黑店敗壞家聲，身為香港人都覺得羞恥啦，消委會卒之忍無可忍，點名譴責兩間位於尖沙咀彌敦道嘅影音店「時尚數碼」以及「日東公司」。根據消委會嘅講法，呢兩間店舖慣常以餌誘同誤導手法經營，並且以遊客為目標，自從去年一月以來接獲一百四十三宗投訴，相關款額超過一百六十萬元，主要涉及攝影器材以及影音產品。
呢嗱嗱嗱，舉個例子吖，有一個深圳遊客向店舖購買一部標價一千三百五十元嘅相機，店員要求先以信用卡付款，不過一轉頭就話相機缺貨，建議遊客購買另一部性能較好嘅相機，售價一千七百元，討價還價最終以一千五百元成交。問題就係，遊客返到深圳之後發現，呢一款產品其實只值六百元，咁先至知道自己做咗一隻被宰的羊牯。
點名譴責過兩間黑店之後，消委會就話嘞，促請政府盡快就《商品說明條例》立法。立法目的好明顯啦，趕盡奸商，殺絕黑店，唔好令到遊客誤以為香港人個個都係咁冇品嘅人類渣滓。正所謂咯喎，一粒老鼠屎搞臭一鍋粥，你冇理由容許少數敗類扼殺整個旅遊業啫，萬一唔想再做羊牯嘅遊客個個一去冇回頭，即使以強迫購物見稱嘅惡導遊阿珍都無用武之地啦，遊客雞飛狗走不存在嘅時候，唔通你對住空氣大吵大鬧「這輩子不還、下輩子也要還出來」咩！
即係咁，黑店宰客等同趕客，立法監管係應有之義。之但係你知啦，特區政府辦事效率往往慢過蝸牛。修訂《商品說明條例》嘅諮詢工作早於去年十月已經完成，不過政府至今尚未向立法會提交草案，即使議員三催四請，負責其事嘅商務及經濟發展局始終好似植物人咁冇乜反應。
咦咦咦，咪住先，商務及經濟發展局局長劉吳惠蘭前一排因病辭職，由副局長頂上嘅蘇錦樑，會唔會一如所料未夠班㗎？保障消費者嘅條例會唔會胎死腹中㗎？
嗱，總而言之，黑店宰客損港譽，立法監管莫踟躕，如果水鬼升城隍嘅蘇錦樑真係未夠班，麻煩閣下移動尊貴盛臀，讓出局長寶座畀適當人選，唔好畀機會黑店宰客宰到一頸血吖嘛，更加唔好害到購物天堂嘅招牌搖搖欲墜！