中央早兩年已對港台官方合作開綠燈，但特區政府照舊歎慢板，令港台關係發展仲慢過老鼠拉龜。港府尋日公布，負責兩地政府溝通嘅「港台經濟文化合作協進會」（協進會）及「台港經濟文化合作策進會」（策進會），今日會喺香港召開第二次聯席會議，但其實台灣方面早喺日前已公布有關消息，連出稿都慢半拍，港府真係失禮死人。
協進會同策進會對上一次開會，已經係一年前嘅事，難怪有知情者揶揄港台合作根本係一台戲，兩地政府都冇心。更何況牽頭呢項工作嘅，係外號「人肉錄音機」嘅政制及內地事務局局長林瑞麟（林D9），佢早前先畀替補機制爭議搞到頭都大埋，由佢負責推動港台合作，好難寄予厚望喎。
除咗林D9表現不濟，睇番去年有份推動港台合作嘅其他高官，代表商務及經濟發展局出訪嘅局長劉吳惠蘭因病辭職，該局常秘蔡瑩璧更加退埋休，將有關工作轉交新任局長蘇錦樑（Greg）處理。Greg蘇早前先爆出僭建醜聞，佢主打嘅競爭法更加面臨畀人大幅剝牙甚至被迫撤回，佢同林公公呢個夢幻組合，港台合作真係凍過水！