政情：林健鋒食盡西班牙
立法會放暑假，唔少議員都趁機會去旅行鬆一鬆。經濟動力立法會議員林健鋒（Jeffrey）亦都唔例外，同埋太太、仔仔、朋友一齊去法國同西班牙玩咗差不多十日，食盡兩國美食，返港後立即發現肥咗，需要食番幾日清淡嘢減磅。
Jeffrey一家同朋友首先到咗法國巴黎同南部嘅酒莊，雖然冇買到靚酒返嚟，但就食咗好多好嘢，包括聽出名識飲識食嘅前經濟發展及勞工局局長葉澍堃介紹，專程搭幾十分鐘的士幫襯當地嘅著名餐廳，最後果然值回票價，但去到其中一間出名煮田雞腿好食嘅餐廳，就咁啱賣晒冇得食，非常掃興。Jeffrey又話，平時外遊一般唔敢食生蠔，但喺法國有一餐就一口氣食咗十六隻，飽到食唔落其他嘢。
Jeffrey一家之後轉往西班牙繼續玩，包括喺巴塞隆拿睇鬥牛，仔仔係第一次睇，Jeffrey自己就好細個喺澳門睇過，但係當然冇喺西班牙睇嘅咁專業，只係求其搭個棚就算，依家諗起都覺得幾危險。Jeffrey喺西班牙食咗當地知名嘅海鮮同燒豬，又話雖然該國政府爆出債務危機，但市面仍然好旺，人民照食照玩，大批內地旅客繼續瘋狂掃貨。