政情：網民Key圖惡搞新特首辦
添馬艦新政府總部沙塵滾滾，但煲呔曾為咗搬入新總部威威，以及喺立法會新大樓宣讀最後一份施政報告，一意孤行強迫班建築工人加班趕工外，日前仲飭令特首辦提早搬入新總部辦公。有網民對煲呔曾嘅好大喜功睇唔過眼，惡搞新特首辦圖片贈興，揶揄特首辦猶如地獄，又重提二○一二政改方案係「超錯」，估唔到煲呔曾未正式返總部已經被網民惡搞，相信到正式入伙後，一定會好戲連場！
原本喺本月底先搬入新政府總部嘅特首辦，突然改期提早喺本周一搬屋，理由好簡單，一來煲呔曾要威，二來最重要係下星期有國家領導人親臨為新總部揭幕，所以就要加班趕工。好多網民都對此睇唔過眼，自發喺社交網站facebook「惡搞上亞厘畢道」群組惡搞新特首辦圖片表達不滿。
第一幅惡搞圖片係將煲呔曾去年推銷政改方案嘅「起錨」口號，改為當時熱爆嘅「超錯」口號，變成牌匾掛喺特首辦門口，同區徽互相輝映。第二幅惡搞圖片就係將特首辦入口大堂牆上個區徽換上「地獄」兩個字，呼籲一班公務員逃離地獄。第三幅惡搞圖片係特首辦個客廳，喺三面牆貼上被指為「鐵三角」嘅三位疑似特首候選人相片，仲猜想邊個會入主。第四幅惡搞相片係特首辦嘅門廳，門嘅左邊貼上最近多次「指指點點」香港事務嘅國務院港澳辦主任王光亞個樣，另一邊就貼上中聯辦副主任黎桂康個樣，十足貼錯門神，並寫上「熱烈歡迎各位領導蒞臨指導工作」，明眼人一睇就知係寸緊夕陽政府管治無能要外人指導。
新總部設計似央視？
煲呔曾除咗畀網民寸爆外，亦有內地報章「贈興」，話有網民質疑新政府總部造型好似俗稱為「大褲衩」嘅北京央視新大樓。估唔到成個新政府總部未完全入伙就有咁多風風雨雨，所以話農曆七月鬼節入伙唔老利呢個講法，真係唔到你唔信。