中環出更：女童軍露營煮食 彭太頭痕
女童軍總監彭徐美雲日前同佢位公子彭穎生（Victor）一齊出席菁英會活動，彭太透露計劃喺年底舉行女童軍大露營活動，佢坦言自己欠缺露營經驗外，又為女童軍野外煮食嘅問題大傷腦筋，講到尾咪係女童軍嘅家長太愛錫自己嘅寶貝女囉！
搵餐飲公司代勞
身為家長嘅彭太話，好明白現今父母愛錫子女嘅心態，要自己嘅寶貝女風餐露宿，梗係有啲唔捨得，如果仲要啲女童軍自行煮食，就更加唔放心，莫講話切菜生火，就算係食落肚嘅菜餚都可能未熟透，因此要諗辦法令啲小朋友食得安全，最穩妥就梗係搵餐飲公司代勞啦！
不過，搵餐飲公司包辦伙食又令彭太覺得失去結繩紮營、獨立求生嘅意義，所以佢話點都要搵機會畀啲女童軍試吓煮一兩餐飯仔，咁至可以體驗野外生活嘅趣味喎！彭太今個星期會啟程去寧夏自治區，一睹小說所描述嘅西夏遺址外，亦會入住蒙古包，當係女童軍大露營之前嘅一次預習。
至於彭太愛兒Victor，過去曾經歷過六年童軍生活，佢話露營期間冇晒對外通訊，完全融入郊野，但時下智能手機普及，就算喺荒山野嶺都可打機上網，令露營嘅樂趣都改變咗。
卓妮