中環出更：鍾志平遊東非睹禿鷹啄屍
工總主席鍾志平（Roy），月前偕太太聯同一班專業及資深行政人員協會成員，拉大隊暢遊東非及南非，呼吸野外大草原清新空氣。出發前，阿Roy一心想睇動物大遷徙，但去到東非大草原先至知，動物奔騰情景可遇不可求，無緣一睹難得嘅奇景。
逾百動物伏屍河中
不過，阿Roy都遇到一幕震撼情景，話說當全隊人路經肯尼亞一條大河時，就遇見逾百隻動物伏屍河中，睇落似係溺斃，又似過河時遇襲死亡，但屍體暴露陽光下，發出陣陣臭味，引來禿鷹盤旋覓食。全河皆屍嘅情景，見者心酸。阿Roy慨嘆，即使動物本性善良，但喺講求適者生存嘅動物世界內，弱肉強食在所難免喎。
轉過頭，阿Roy又睇見大笨象游水過河，龐然巨物，撥水卻好敏捷，三扒兩撥游到對岸，團友都寫個服字。今次話明係超豪非洲團，食宿當然唔失禮，阿Roy自爆喺南非大擦兩頭鮑魚，啖啖鮮味，聽見都流口水，臨走前，佢又狂掃鴕鳥蛋，蛋殼繪上非洲五大動物（Big five），包括獅子、花豹、大象、犀牛、水牛，畫工精緻，做手信至啱。
卓妮