假如有一個二世祖，向你傳授知慳識儉嘅美德，你會有乜嘢反應吖嗱？功夫茶估計你一定會Ｏ晒嘴，話唔定即時寸爆對方：唔好玩啦，你唔敗晒祖宗家業先至學人做道德佬啦！
即係咁，水務署話喎，今年八月至十二月將會推行家居用水研究計劃，向隨機選出嘅一千個家居用戶蒐集意見，記錄水錶讀數、水龍頭同花灑流量，調查用水習慣以及節約用水嘅認知等等。水務署得到資料分析用水模式之後，將會設計更全面同有效嘅節約用水措施。
呢嗱嗱嗱，大家可能覺得好正常啫，水務署教人節約用水係天經地義。如果你係咁諗，你大概忘記咗一個殘酷現實，水務署先至係全港浪費食水最多嘅超級大戶。由一個敗家仔去教你慳家，你話係咪荒謬到極？如果真係有必要家訪，功夫茶即刻諗到要直接拜訪水務署署長馬利德，兜口兜面問佢老人家：喂，水務署帶頭節約用水得唔得？水管唔好日爆夜爆有冇可能？
唉，香港爆水管簡直爆到成為慣例，舊年之嘛，全年有六百零九宗，平均一日超過一宗。呢一個數字已經叫做改善咗㗎喇，○一年高峰期係二千五百宗，平均一日接近七宗！
普通爆水管已經夠煩，新蒲崗寧遠街越秀廣場對開路邊冇耐之前又係爆水管，漏出嘅食水竟然多到足以灌滿整條行人隧道。為防有人被困，必須出動消防蛙人戒備，可想而知漏水情況係幾咁誇張。
水務署之所以浪費食水，主要原因係水管老化，一係就漏，一係就爆。結果咯喎，每年損失二億立方米珍貴水源，佔總供水量兩成，涉及金額七億元。既然係水管老化，當然有必要更換，之但係呢一個「水皮服務署」手慢腳慢，更換水管進度奇差。計劃係更換以及修復三千公里老化水管，早於二○○○年已經開始㗎嘞，十一年之後到咗今時今日先至換咗一半。換句說話，水管將會繼續爆，食水將會繼續漏，敗家行為不知何日方休。
有一家嘢幾搞鬼，可能同鬼聲鬼氣盂蘭節有關。發展局話喎，水管工程已經完成一半，餘下工程預期二○一五年完成。大家計一計數，之前用十一年時間完成一半工程，因乜事幹之後可以用四年完成另一半？如果唔係發展局鬼話連篇，咁就肯定係有錢使得鬼推磨，特別情商一眾鬼大哥過咗盂蘭節都唔好重返鬼門關，未來四年留喺陽間幫水務署趕工。
總而言之，敗家仔教你慳家，令人啼笑皆非嘅水務署都可算係爛Gag王子！