做咗商務及經濟發展局局長一排嘅蘇錦樑（Greg），表現都係無咩起色，《競爭法草案》依然一鑊泡。民建聯唔想條法例就咁收檔，早前私底下整咗修訂方案畀阿Greg，話修訂方案四大商會都接受，只要政府肯吸納，民記嗰九票就袋袋平安。不過佢哋所提嘅方案其實已經剝晒牙，仲要阿Greg出手修訂，即係要佢自己剝牙。
民記建議嘅修訂。其中一改動就係門檻，唔會以市場所佔百分比作判定，而係變成定額，即係就算壟斷晒成個行業，但營業額唔到一定數目，都唔會受到法例規管，聽聞亦係呢個改動令商界最安心。
民記改到條法例咁無牙力，無非都係想向商界交代，始終佢哋無論直選定功能組別，有唔少票源都係來自商界，今次為咗選票，就算阿Greg曾經係民記副主席，都擺到明要向佢開刀，逼佢硬食，否則實無民記嗰九票。阿Greg現時只得民主黨同公民黨支持，根本唔夠票在手，修草案唔剝晒啲牙，睇嚟都唔夠票通過。