區議會選舉將至，又係各參選人被揭發醜聞嘅高峰期。尋日我哋收到讀者投訴，報稱人民力量嘅區議員甄啟榮搞咗個抗議小巴遊行，但隨即向遊行街坊派米，令人質疑佢利用着數吸引街坊遊行。甄啟榮尋日接受查詢時話指控根本唔成立，雖然佢有向街坊派米，但自己唔係人民力量成員，遊行亦唔係由佢發起。
每逢區選臨近，黑材料消息一定滿天飛。有深水埗街坊話，人民力量前日喺白田邨遊行，事後仲向遊行人士派紙仔，憑紙拎米，又爆派米人正係想連任嘅甄啟榮。甄啟榮尋日好勞氣咁澄清三大點，先話自己係獨立民主派，並不屬人民力量。佢話同人民力量曾經合作，但之後為免被人誤會，已同佢哋分道揚鑣。至於派米一事，佢話自己年年都派過千包盂蘭節平安米畀街坊，但從無理會拎米嘅街坊參加過乜活動，亦無叫街坊拎紙仔先有米拎。而前日嘅遊行，佢就話完全唔關自己事，自己只係做旁觀者，唔明白點解有人要投訴佢喎。