政情：台作家張曼娟掌光華中心
香港同台灣關係逐漸升溫，角色愈來愈吃重嘅香港光華新聞文化中心快將會有新領導，台灣暢銷小說作家張曼娟下月一日起出任香港光華新聞文化中心主任，接替早前突然辭職嘅原中心主任羅智成。羅智成本身既係一名作家亦係詩人，佢前任嘅光華主任路平，亦係一位作家。
現年五十歲嘅張曼娟，代表作係第一本出版嘅《海水正藍》，一九八五年出版以來締造咗超過五十萬本以上嘅銷售紀錄，成為台灣當代最長銷同暢銷嘅小說。之後佢又創立全球華文出版界第一間文學企劃同作家經紀公司「紫石作坊」並擔任總策劃。
小說暢銷 多才多藝
除咗文學以外，佢又創作歌詞，主持廣播同電視等，總之多才多藝。張曼娟話，台灣近幾年有好多新興文化，包括二手書店，佢希望喺香港舉行二手書店展，或者香港人會感興趣。
講開又講，台灣策進會與香港協進會明日會喺香港舉行第二次聯席會議，有咩成果真係要開完會至知喇！