政情：特首辦搬竇多甩漏

上星期嘅周末，特首辦已經為搬屋做準備，陸續將文件、辦公室傢俬運去新政總，之後仲出份白紙黑字新聞稿，大事宣揚搬屋一事，講明尋日開始，特首辦新地址係金鐘添華道一號。

不過直到尋晚為止，我哋喺網上政府電話簿發現，特首辦嘅地址依然係寫住五個字：「香港禮賓府」。

禮賓府依家嘅角色，其實已經變成煲呔曾嘅官邸，好話唔好聽，萬一有市民寄信去褒揚或者鬧爆煲呔曾，封信都會寄錯去禮賓府，到時又要專登搵人送番去新政總，咪費時失事囉！

話時話，特首辦有個facebook專頁叫做「上亞厘畢道」，依家特首辦都搬離咗上亞厘畢道，專頁明顯名不副實，唔通煲呔曾嘅官邸廁所漏水都關公眾事咩？既然煲呔曾經常將民意當耳邊風，不如佢今次將專頁名稱改成網民提議嘅「上阿爺嗰道」算啦，一來呢個名永遠都無更改嘅需要，二來亦配合煲呔曾無乜自主能力嘅個性。

譚志源焗兩頭騰

講起費時失事，尋朝八點無耐，特首辦主任譚志源坐住座駕到新政總返工，點知半個鐘左右，有份開早禱會嘅佢就要同埋班同事坐車走番去中環，開完再返番去新政總，來來回回，嘥時間唔在講，仲要嘥電油，認真唔環保。

依家一眾司局長都未搬屋，煲呔曾自己一個搬離中環，期間唔係人哋就佢就係佢就人哋，點講都係麻煩。

既然煲呔曾唔喺度，尋日譚志源就係特首辦最大粒嗰個，當然由佢講番新竇嘅感受。今次佢就威威啦，成為首位企喺新特首辦門口接受訪問嘅官，雖然佢只係講官話，大讚新政總樣樣都好好，但係一講到副總理李克強係咪會為添馬艦揭幕，佢就一味避談，叫大家耐心啲等。