中環耳目：李三元細味歷史樂趣
前東華主席李三元（John）卸任後，靜雞雞喺中大修讀歷史碩士課程，話咁快年底畢業。唔少人認為，讀呢科無助「搵飯食」，錯晒嘞。阿John話，學歷史有助鑑古知今，頭腦即時開竅。
阿John愛搜尋美食，呢日佢選擇去銅鑼灣開平道agnes b餐廳食晏，品嘗一味紅酒煮和牛面珠，邊食邊同卓妮分享佢讀書嘅樂趣。阿John話，上歷史堂絕唔悶，其中一科中國飲食文化史，更聽得佢津津有味。佢選擇上海菜做功課課題，翻閱古籍，發現上海其實冇太多名菜，反而以淮揚菜居多，只係外來人喺上海食過好味嘅淮揚菜，統稱之為上海菜喎。
理解內地劈酒文化
除咗美食史，阿John話最大得益，係學習中國經濟史。阿John笑言，從事皮革生意多年，一直不擅於同內地人做生意，抗拒劈酒及送禮文化。但上完歷史課先發現，原來由明朝開始，商人就喜歡摸住酒杯飲酒傾生意，以示彼此坦蕩蕩，沒有隱藏。佢笑言應該早廿年讀呢科，行走商界，一定無往而不利。
卓妮