中環出更：陳晴憂冧市火燒連環船

聯合國兒童基金會前晚舉行慈善音樂騷，慶祝廿五周年，吸引名人嚟聽歌。陳晴身為香港委員會主席，滿場飛招呼嘉賓。講起大冧市，佢話美國經濟一直都未全面恢復，佢憂慮今次「降呢」事件會波及歐洲甚至中國，幸好中國經濟增長勁，認為就算有影響，都係好輕微。

梁定宇（左）無炒股，冧市都唔關佢事。	區璟智（右）同老公冼先生拍拖入場。	張永珍（右）帶放暑假返港嘅外孫Gabriel齊做善事。 （何偉鴻攝）

前東華三院主席梁定宇（Billy）一家三口同來，佢對冧市好淡定，笑言絕少炒股，市況震盪都唔關佢事，疊埋心水打理家族生意。Billy早前舉家遊洛杉磯返港，趁暑假歎世界。

張永珍帶混血外孫見世面

人稱「頭箍小姐」嘅財經事務及庫務局常秘區璟智都同佢嘅銀行家老公冼銳民拍拖嚟聽好歌。佢話，外圍立立亂，要打醒十二分精神去實個市，呢排周身唔得閒。佢又呼籲小股民量力而為，入市要小心謹慎喎。

張永珍就拉埋孫仔撐場，外孫長得俊朗，吸引唔少賓客目光。張永珍介紹話，外孫係混血兒，名叫Gabriel，今年十七歲。雖然外表洋化，但Gabriel居於上海，講得一口流利普通話，稍後去美國升讀大學，但外婆不時勸佢多了解國情，畢業後返中國發展。

講番音樂會，觀瀾湖太子爺朱鼎耀都同太太及一對仔女捧場。囡囡上台客串一曲《We are the world》，台型十足。

卓妮