港府搞環保一事無成，但係花樣絕對唔少，政策措施五時花六時變，可惜吖，變嚟變去都離唔開兩個字：掠水！嗱，又嚟嘞，今次仲離譜，大小通殺，無論普羅市民或商業機構，統統走唔甩。
可持續發展委員會就樓宇節能減排提出多項建議，包括收緊能源效益標籤計劃、推動碳審計等等。其中最具爭議嘅係檢討電費架構，話要學美國、澳洲同台灣等地，引入漸進式、分季節或分時段收費，即係話，天氣愈熱，用電愈多，收費就愈貴。當局話，咁做係要改變用電量大嘅習慣，鼓勵市民慳電喎。
冇錯，節能減排，改善空氣係好事，但都要顧及實際情況至得㗎，東施效顰隨時撞大板嘅咋。好簡單，近排天氣熱到幾乎爆炸，食肆舖頭冷氣唔夠，點做生意吖？又譬如，好多公屋及私人舊樓環境擠迫，密不透風，唔開冷氣，豈不是隨時焗死？用電愈多收費愈貴，等於犧牲基層利益，唔怪得有立法會議員批評，調整電費建議太理想化咯。
唔只市民同議員反對，連可持續發展委員會主席陳智思自己亦承認，設定用電繁忙時間問題複雜，社會對電費架構調整難有共識，部分行業電費負擔亦會因此增加，有關建議要喺香港實施有一定難度。其實點只有難度，簡直九唔搭八，似環保騷多過節能減排。
講到環保騷，大家早已見怪不怪，問題係，鋪鋪都要搵市民埋單，咁先至離晒大譜。例如徵收膠袋稅，錢照收可也，但居然唔係用於環保，而係入晒庫房，咁即係擺到明藉環保掠水嘅啫。
最弊係徵收膠袋稅之後，本港不織布袋產量勁升九成六，垃圾袋產量增加六成三，整體膠袋用量按年升超過半成。環保適得其反，你話係咪搞笑吖！
仲有吖，係人都知造成本港烏煙瘴氣嘅「元兇」之一係巴士等大型車輛，但當局反而向私家車開刀，一時搞停車熄匙，一時又增加首次登記稅，簡直係本末倒置。
話到尾，夕陽政府樣樣算死草，淨係識得利用環保斂財，而本身嘅責任就推得一乾二淨。計功夫茶話齋，既然港府對分級收費有興趣，不如官員嘅薪酬亦照辦煮碗，減排愈多攞得愈多，廢氣愈多扣得愈多，至於「氣候逃犯」咯喎，唔使倒貼都偷笑喇！