夕陽政府施政無能，導致民憤爆煲，煲呔曾同政務司司長唐英年每逢出席公開活動做騷，都遇到八十後示威者掟嘢狙擊，兩人最後「斬腳趾避沙蟲」，活動後先至發新聞稿、相片及短片，以逃避傳媒追訪同示威者狙擊。好不幸，過往同傳媒及基層組織關係唔錯嘅勞工及福利局局長張建宗，最近亦畀兩人荼毒，鬼祟落區再隔過夜先公布，真係近朱者赤，近墨者黑。
政府新聞處尋日中午發出新聞稿同相片，指張建宗一連兩日參觀咗多個社區投資共享基金支持嘅社區計劃，其中前日到過天水圍，探訪兩個由當地婦女同青年義工推行嘅鄰里相助項目，尋日朝早又去咗香港仔，參觀一項由商界、教育界、專業團體同社福界合作推行嘅青少年就業援助服務。
照計三項計劃都係好人好事，張建宗近期又冇乜甩漏或醜聞，即使事先通知傳媒，都唔會好似煲呔曾巡區咁引起混亂，更唔會有示威者有興趣狙擊，都唔知佢驚乜！