政情：許漢忠寸高鐵成效差
香港國際機場興建第三條跑道正在諮詢公眾，外界普遍質疑環保影響及能否達到經濟效益，就連一班政壇新秀都有呢啲質疑，尋日更喺電台節目上當面質問機管局行政總裁許漢忠。
有政壇新秀話，鄰近內地城市嘅機場航線不斷上升，加上將來廣深港高鐵落成後會帶走本地乘客，如果要等第三條跑道落成，可能會錯失黃金時機，達唔到預期經濟效益。
面對政壇新秀連番質詢，許漢忠不厭其煩逐一解答，佢強調香港競爭力強勁，有信心新跑道達到經濟效益。對於高鐵會帶走本地航班乘客嘅問題，佢就寸爆高鐵話：「高鐵成效不彰，就算短途客去晒內地，都係佔本地客量嘅百分之三，我哋大部分都係國際航班，同高鐵無關係，亦唔存在替代性。」
會上又有政壇新秀建議機管局一併考慮興建第四及第五條跑道，但許漢忠話：「如果要起埋第四、五條，我自己心諗，等十年都未有社會共識呀，實際情況有一定局限，依家起多一條已差不多到頂點！」佢嘅回應真係一矢中的，切合現時社會嘅實況。