政情：孫公大展歌喉氹學生
教育局局長孫明揚（孫公）經過早前一輪是非纏身後，尋日出席一個青少年活動時就罕見咁露出久違嘅笑容，而且歌癮大發，即場同司儀唱咗兩首英文歌，為一班中七畢業生打打氣，搞到班後生仔個個
嘩鬼叫、拍爛手掌，孫公仲好豪氣咁即場答應明年會資助呢個活動添！
尋日約二百個中七畢業生齊齊出席「太陽計劃2011永不放棄同學會畢業典禮」活動，個個同學都好投入，大部分畀主持請上台分享嘅畢業生都喊到收唔到聲，個個咁喊法，最終搞到節目超時，但孫公都好有耐性等候，冇提早離開。
去到尾聲，主持人邀請孫公上台一齊唱英文歌，原來大會只係安排孫公唱一首，點知孫公竟然自動波唱多首，兩隻歌分別係《Do-Re-Mi》及《Edelweiss》，唱得都算唔錯，話晒兩首歌都有超過四十年歷史，擺明係屬於孫公嘅年代啦！