政情：甘威視察上環站似做騷
港鐵上環站尋日起暫時封站兩日，港鐵為市民提供來往上環至金鐘嘅接駁穿梭巴士。立法會議員兼中西區區議員甘乃威就事先張揚尋日早上十時去上環站外視察交通情況，但尋日佢未夠十時就現身，吸引現場傳媒一擁而上訪問，可能佢見仲未夠十時，於是好認真話要睇多五分鐘先答問題喎，只係簡單回應話自己到場前行過上環一帶，滿意秩序情況。
不過，金鐘站係港鐵嘅交通樞紐，最有可能出亂子，點解甘乃威唔去金鐘站睇吓先呢？唔知佢係咪聽唔到，定係堅決要等齊記者先至接受訪問，總之就無答到啦！佢只係忙住企定定被攝記影相。其後一眾行家訪問完畢，再問佢會否去金鐘站視察吓，佢先至突然決定增加視察行程，搭免費接駁巴士去金鐘站，親身體驗接駁交通安排喎！
其實根據區議會選區劃界，甘乃威屬於上環選區，唔安排落金鐘站視察都好難怪佢，但佢作為港島區立法會議員，全港島嘅事務都責無旁貸，否則被人批評佢做騷多過做嘢就唔好啦！